Xırdalanda məktəbdə ciddi suallar: Bir müəllimə iki sinfə necə rəhbərlik edir? 34-35 şagirdli siniflər və pul yığımı iddiaları…

Abşeron rayonunun Xırdalan şəhərində yerləşən 1 nömrəli tam orta məktəbdə baş verdiyi iddia olunan hallar valideynlərin və ictimaiyyətin ciddi narahatlığına səbəb olub.

Söhbət məktəbin coğrafiya müəlliməsi Esmira Şirinovanın fəaliyyəti ilə bağlı səsləndirilən iddialardan gedir. Valideynlərin təqdim etdiyi məlumatlara əsasən, müəllimənin eyni vaxtda 6-cı və 10-cu siniflərə sinif rəhbərliyi etdiyi bildirilir.

Əgər bu məlumatlar doğrudursa, ortaya mühüm sual çıxır: bir müəllimə hansı əsasla iki ayrı sinfin sinif rəhbərliyi vəzifəsini icra edir? Bu təyinat hansı qaydalara və hansı hüquqi əsaslara söykənir?

Bir sinifin rəsmi rəhbəri başqa, faktiki rəhbəri başqa?

İddialara görə, siniflərdən birinin rəsmi sənədlərdə sinif rəhbəri başqa müəllim göstərilsə də, faktiki olaraq sinif rəhbərliyi Esmira Şirinova tərəfindən həyata keçirilir.

Daha ciddi sual isə maliyyə məsələsi ilə bağlıdır. Valideynlərin iddiasına əsasən, sinif rəhbərliyinə görə nəzərdə tutulan ödənişin sənədlərdə adı göstərilən müəllim tərəfindən alındığı, daha sonra isə Əsmira Şirinovaya verildiyi bildirilir.

Bu məlumatların doğru olub-olmadığı araşdırılmalıdır. Əgər belə bir ödəniş mexanizmi mövcuddursa, bunun maliyyə və əmək qanunvericiliyinə uyğunluğu yoxlanılmalıdır.

34-35 şagird bir sinifdə: Paralel sinif niyə yaradılmır?

Valideynlərin digər narazılığı siniflərdə şagird sayının çoxluğu ilə bağlıdır.

İddialara görə, bəzi siniflərdə 34-35 şagird təhsil alır. Hətta bəzi uşaqların sənədlərdə başqa siniflərdə qeydiyyatda olduğu, faktiki olaraq isə Esmira Şirinovanın rəhbərlik etdiyi sinifdə dərs keçdiyi bildirilir.

Əgər bu məlumatlar təsdiqlənərsə, məktəbdə şagirdlərin siniflər üzrə bölgüsü, elektron qeydiyyat və faktiki davamiyyət arasında uyğunsuzluğun səbəbləri araşdırılmalıdır.

Siniflərdə şagird sayının müəyyən edilmiş normativlərə uyğunluğu da yoxlanılmalıdır. Təhsilalanların sayının çoxluğu həm tədrisin keyfiyyətinə, həm də uşaqların təhsil şəraitinə mənfi təsir göstərə bilər.

Summativ qiymətləndirməyə görə pul yığılması iddiası

Valideynlərin səsləndirdiyi ən ciddi narazılıqlardan biri də şagirdlərdən summativ qiymətləndirmə ilə əlaqədar pul tələb edilməsi iddiasıdır.

Əgər qiymətləndirmə adı altında valideynlərdən qanunsuz ödəniş tələb edilirsə, bu hal təhsil müəssisəsində maliyyə intizamı və şəffaflıq baxımından ciddi araşdırma tələb edir.

Burada əsas məsələ konkret olaraq kimin pul tələb etməsi, vəsaitin hansı məqsədlə toplanması və bu ödənişlərin hüquqi əsasının olub-olmamasıdır.

Elm və Təhsil Nazirliyi, Abşeron-Xızı Regional Təhsil İdarəsi hara baxır?

Ortaya bir sıra suallar çıxır:

1. Esmira Şirinovanın iki sinfə sinif rəhbərliyi etməsi hansı əmrlə rəsmiləşdirilib?
2. Siniflərdən birinin rəsmi rəhbəri başqa müəllimdirsə, faktiki rəhbərliyin başqa şəxs tərəfindən həyata keçirilməsinin səbəbi nədir?
3. Sinif rəhbərliyinə görə ödənişlərin kimə verildiyi yoxlanılıbmı?
4. 34-35 şagirdin bir sinifdə yerləşdirilməsi hansı normativlərə əsaslanır?
5. Şagirdlərin bir sinifdə qeydiyyatda olub, başqa sinifdə təhsil alması barədə iddialar araşdırılıbmı?
6. Summativ qiymətləndirmə adı ilə valideynlərdən pul tələb edilməsi halları varmı?

Təhsil müəssisələri şəxsi münasibətlərə və ya qeyri-rəsmi razılaşmalara deyil, qanunvericiliyə və şəffaf idarəetmə prinsiplərinə əsaslanmalıdır.

Rəsmi araşdırma və aydın cavab tələb olunur!

Elm və Təhsil Nazirliyini, Abşeron-Xızı Regional Təhsil İdarəsini və aidiyyəti nəzarət qurumlarını Xırdalan şəhər 1 nömrəli tam orta məktəbdə səsləndirilən bu iddiaları araşdırmağa, sənədləri yoxlamağa və ictimaiyyətə rəsmi açıqlama verməyə çağırırıq.

Məqsəd hər hansı şəxsi əvvəlcədən təqsirli elan etmək deyil. Məqsəd şagirdlərin hüquqlarının qorunması, valideynlərdən qanunsuz vəsait tələb olunmasının qarşısının alınması və məktəbdə şəffaflığın təmin edilməsidir.

Bəs məktəb rəhbərliyi və aidiyyəti təhsil qurumları bu suallara nə cavab verəcək?

Qeyd: Məqalədə qeyd olunan hallar valideynlər tərəfindən irəli sürülmüş iddialardır. Onların həqiqiliyi rəsmi sənədlər və aidiyyəti qurumların araşdırması ilə müəyyən edilməlidir. Esmira Şirinovanın və məktəb rəhbərliyi Direktor Arifə Balakişiyevanın mövqeyinə də yer verməyə hazırıq.
Www.bakufakt.az