Paytaxtın Nərimanov rayonunda fəaliyyət göstərən məşhur “MADO” restoranının ətrafında aparılan tikinti və genişləndirmə işləri ciddi suallar doğurur. Ərazidə baş verən dəyişikliklər yerli sakinlərin haqlı narazılığına səbəb olmaqla yanaşı, şəhərsalma qaydalarına, ictimai məkanların qorunmasına və qanunvericiliyin tələblərinə əməl olunub-olunmadığı məsələsini də gündəmə gətirir.

Əsas sual isə budur: “MADO” restoranının ərazisini genişləndirməsi hansı hüquqi əsaslara söykənir?

İctimai istifadə üçün nəzərdə tutulan sahələrdə aparılan tikinti işləri, mümkün ərazi zəbt olunması və piyadaların sərbəst hərəkətinə maneələrin yaranması ilə bağlı narahatlıqlar cavabsız qalmamalıdır. Heç bir kommersiya obyektinin fəaliyyəti ictimai maraqlardan və şəhər sakinlərinin hüquqlarından üstün ola bilməz.

Əgər aparılan işlər qanuni əsaslara söykənirsə, restoran rəhbərliyi bunu təsdiq edən sənədləri və müvafiq icazələri ictimaiyyətə açıqlamalıdır. Əgər tikinti və genişləndirmə işləri lazımi icazələr olmadan aparılırsa, bəs buna nəzarət etməli olan qurumlar haradadır?

Daha bir ciddi sual ortaya çıxır: Nərimanov Rayon İcra Hakimiyyəti və Dövlət Şəhərsalma və Arxitektura Komitəsi bu prosesdən xəbərdardırmı? Əraziyə baxış keçirilibmi? Tikinti sənədləri yoxlanılıbmı? Sakinlərin şikayətləri niyə ictimaiyyət qarşısında aydın cavablandırılmır?

Qanun hamı üçün eyni deyilmi?

Məsələ təkcə bir restoranın genişləndirilməsi deyil. Söhbət şəhər mühitinə, ictimai ərazilərə və vətəndaşların sərbəst hərəkət hüququna hörmətdən gedir. İctimai məkanların kommersiya məqsədilə istifadəsi ilə bağlı hər hansı qərar şəffaf və qanuni əsaslarla izah edilməlidir.

“MADO” restoranının rəhbərliyini, Nərimanov Rayon İcra Hakimiyyətini və Dövlət Şəhərsalma və Arxitektura Komitəsini susqunluğa son qoymağa, tikinti işlərinin qanuniliyinə dair rəsmi mövqelərini açıqlamağa çağırırıq.

İctimaiyyət cavab gözləyir: Bu tikintiyə icazə verilibmi? Ərazinin genişləndirilməsi hansı sənədlər əsasında həyata keçirilir? Və ən əsası, vətəndaşların narazılığına kim cavab verəcək?

Bu suallar cavablandırılmadan məsələni bağlanmış hesab etmək olmaz.