Zərərçəkmiş Hacıyev Hüseyn Sərdar oğlu redaksiyamıza müraciət edərək ona qarşı oğurluq əməli törədildiyini bildirib.

Onun sözlərinə görə, həmin əməllə bağlı Yasamal rayon Polis İdarəsinə müraciət edib. Həmin şəxslər barəsində Cinayət Məcəlləsinin 177.2.1, 177.2.3 və 177.2.4-cü maddələri ilə cinayət işi açılıb:

“Həmin iki şəxs mənə dəymiş 11000 manat ziyanı ödəmədiyi və mənimlə barışıq əldə etmədiyi üçün Yasamal rayon prokuroru həmin şəxslərin istintaq müddətində həbsdə saxlanılması üçün Yasamal rayon Məhkəməsinə təqdimatla müraciət etdi. Lakin Yasamal rayon Məhkəməsinin hakimləri Rauf Daşdəmirov və Sevinc Quliyeva imperativ norma olan Cinayət-Prosessual Məcəlləsinin 155.2.4-cü maddəsinin tələblərini kobud şəkildə pozaraq həmin şəxslər barəsində həbs qətimkan tədbiri seçmədilər.

Necə ola bilər ki, hər iki şəxs barəsində istintaq vaxtı axtarış elan olunur və bu hallarla sanksiyaya çıxarılırlar, lakin dəymiş 11000 manat ziyan ödənilmədiyi və mənimlə barışıq əldə edilmədiyi halda həmin şəxslərin barəsində həbs qətimkan tədbiri seçilmir? Axı Cinayət-Prosessual Məcəlləsinin 155.2-ci maddəsində qeyd edilir ki, qətimkan tədbirinin seçilməsinin zəruriliyi, onlardan hansının konkret şübhəli və ya təqsirləndirilən şəxsə tətbiq edilməsi məsələsi həll edilərkən təhqiqatçı, müstəntiq, ibtidai araşdırmaya prosessual rəhbərliyi həyata keçirən prokuror və ya məhkəmə aşağıdakıları nəzərə almalıdır: şübhəli və ya təqsirləndirilən şəxsin zərərçəkmiş şəxslə və ya onun yaxın qohumu olan hüquqi varisi ilə barışıq əldə edib-etməməsini, cinayət nəticəsində vurulmuş ziyanın ödənilib-ödənilməməsini və digər əhəmiyyətli halları.

Həmin şəxslər bizimlə nə barışıq əldə edib, nə də dəymiş ziyanı ödəyiblər”.

Şikayətçi bildirib ki, buna görə də Yasamal rayon Məhkəməsinin hakimləri Cinayət-Prosessual Məcəlləsinin imperativ normasının tələblərini kobud şəkildə pozduğundan və həmin tələblərdən kənara çıxdıqları üçün qərarları ləğv edilməsi üçün Bakı Apellyasiya Məhkəməsinə müraciət edib:

“Həmin iş Bakı Apellyasiya Məhkəməsinin hakimi Habil Məmmədovun icraatındadır və o, 17.02.2025-ci tarixdə keçiriləcək iclasa  sədrlik edəcək”.

O, Məhkəmə-Hüquq Şurasının sədri İnam Kərimov və Bakı Apellyasiya Məhkəməsinin sədri Mübariz Əkbərova müraciət edib:

“Hörmətli sədrlər! Xahişim budur ki, Yasamal rayon Məhkəməsinin hakimləri Rauf Daşdəmirov və Sevinc Quliyeva imperativ norma olan Cinayət-Prosessual Məcəlləsinin 155.2.4-cü maddəsinin tələblərini kobud şəkildə pozduğu üçün həmin hakimlərin barəsində intizam tədbiri görməklə yanaşı, Bakı Apellyasiya Məhkəməsinin hakimi Habil Məmmədovun icrtaatında olan şikayətimi nəzarətə götürəsiniz”.

"Bakufakt.az"