Milli Məclisin üzvü Naqif Həmzəyev parklanma ilə bağlı tariflərə yenidən baxılacağına ümid etdiyini bildirib.

Deputat son dövlər Bakıda parklanma yerləri ilə əlaqədar bir çox müzakirələrin olduğunu xatırladıb.

O qeyd edib ki, xüsusilə, ictimai park yerlərində aylıq parklanmaya dair tariflərin qiymətinin artırılması birmənalı qarşılanmayıb:

"Həmin ərazilərdə yaşayan sakinlər üçün bu addım sərfəli olsa da, məhz sözgüedən ərazilərdə işləyən vətəndaşlar üçün bu cür qiymətlərə parklanma o qədər də əlverişli deyil. Bu baxımdan təklif edirəm ki, aylıq parklanmaya görə, yalnız həmin ərazidə yaşayan sakinlər üçün deyil, eyni zamanda bu ərazilərə yaxın yerlərdə işləyən vətəndaşlar üçün də daha münasib qiymətlərə parklanma təmin edilsin".

Deputatın sözlərinə görə, nəzərə almaq lazımdır ki, parklanma yerlərinə yaxın ərazilərdə yaşayan insanlar 24 saat ərzində parklanma xidmətindən istifadə edə bilirlər, lakin sözügedən ərazilərə yaxın yerlərdə işləyənlər isə gün ərzində ən çox 8-9 saat parklanmadan istifadə edirlər.

"Parklanma yerlərinə yaxın ərazidə yaşayan və işləyən vətəndaşlar üçün endirimli, daha münasib tariflər tətbiq edilərsə, daha ədalətli olar. Çalışmalıyıq ki, parklanma ilə bağlı tariflər müəyyənləşdirildikdə gəlirdən daha çox yollardakı tıxacların qarşısının alınması ilə problemin birtərəfli yox, hərtərəfli qaydada həllinə nail olaq. Ümid edirəm ki, parklanma ilə bağlı tariflərə yenidən baxılacaq və yuxarıda qeyd etdiyimiz məqamlar nəzərə alınaraq yeni qərarlar qəbul olunacaq".