Yaponiyada yerləşən sualtı vulkanik kraterdə indiyədək qeydə alınmış ən yüksək qızıl konsentrasiyası müəyyən edilib. Alimlər kəşfin həm iqtisadi, həm də ekoloji baxımdan mühüm nəticələr doğura biləcəyini bildirirlər.
 

Bakufakt xəbər verir ki, “Scientific Reports” jurnalında dərc olunan araşdırmaya əsasən, Tokio şəhərindən təxminən 350 kilometr cənubda, İzu adaları yaxınlığında yerləşən Hiqaşi-Aoqaşima kalderasında rekord həcmdə qızıl ehtiyatı aşkarlanıb.

Şizuoka, Vaseda və Tokio universitetlərinin alimləri ilk dəfə 2015-ci ildə müəyyən edilmiş hidrotermal yataqlardan robot qollar vasitəsilə qaya nümunələri götürüblər. Müasir analiz üsulları sayəsində okeanın dibində çılpaq gözlə görünməyən “görünməz qızıl” yataqları üzə çıxarılıb.

Tədqiqatçılar müəyyən ediblər ki, qızıl hissəcikləri “saxta qızıl” kimi tanınan pirit mineralının daxilində atom və nanopartikül formasında yerləşir. Bildirilir ki, bölgədəki pirit yataqları hazırda dünyada ən yüksək qızıl konsentrasiyasına malikdir.

Alimlər qeyd edirlər ki, digər oxşar yataqlarla müqayisədə Hiqaşi-Aoqaşima kalderasının daha dayaz dərinlikdə yerləşməsi gələcəkdə kommersiya baxımından hasilatı daha əlverişli edə bilər.

Bununla belə, kəşf dərin dəniz mədənçiliyinin ətraf mühitə təsiri ilə bağlı müzakirələri yenidən gündəmə gətirib. Aktiv hidrotermal sahələr xərçəngkimilər, mərcanlar, süngərlər və müxtəlif balıq növləri üçün mühüm yaşayış mühiti hesab olunur.

Alimlər xəbərdarlıq edirlər ki, kommersiya məqsədli mədən işləri bu həssas ekosistemlərə ciddi zərər vura bilər.

Hazırda dünyada kommersiya məqsədilə fəaliyyət göstərən dərin dəniz qızıl mədənləri yoxdur. Buna baxmayaraq, Yaponiya ekoloji narahatlıqlara rəğmən, dərin dəniz yataqlarının araşdırılmasını davam etdirir.