Bakufakt.az Oxu.az saytına istinadən xəbər verir ki, Azərbaycan Rusiya ilə ciddi ixrac, həm də idxal əlaqələrinə malikdir. Uzun müddətdir ki, şimal qonşumuz siyasi maraqlarına görə məhsulların ölkəyə girişində müəyyən məhdudiyyətlər tətbiq etmişdi. Elə buna misal olaraq Rusiya bir neçə ildir ki, ölkəmizdən ixrac olunan pomidor, alma və digər bu kimi mallara tam nəzarət edirdi. Amma indiki halda bunun əksi müşahidə olunmaqdadır. Bizim sahibkarlar ora məhsul yollamaqda bir o qədər də maraqlı deyillər. 

Qeyri-neft, xüsusən də kənd təsərrüfatı məhsullarının ixracında Rusiya ölkəmiz üçün əsas bazardır. Belə ki, sözügedən ölkəyə ixrac Azərbaycanın qeyri-neft ixracının üçdə birini təşkil edir. Ölkəmizin xarici ticarət dövriyyəsində Rusiyanın payı 9 faizə qədərdir. 

İqtisadçılar bildirirlər ki, son günlər siyasi fonda baş verən gərginlik Rusiyanın dünya iqtisadiyyatından təcrid edilməsi ilə nəticələnir. Belə olan halda Rusiya, ona qarşı sanksiyalar tətbiq etməyən, xüsusən də münasibətlərinin yaxşı olduğu ölkələrlə ticarət dövriyyəsini artırmağa çalışır. Bu həm də Azərbaycan sahibkarları üçün əlavə imkanlar yaradır.

Ekspertlər isə hesab edir ki, Rusiyanın SWIFT-dən kənarlaşdırılması, daxili tələbatını ödəməməsi səbəbindən onu keçmiş SSRİ respublikalarından asılı vəziyyətə salacaq.