Mingəçevir Şəhər Mərkəzi Xəstəxanasının doğum şöbəsində baş verdiyi iddia olunan hadisələr və mövcud şəraitlə bağlı vətəndaşlar tərəfindən ciddi narazılıqlar səsləndirilir. Şikayətçilər bildirirlər ki, müşahidə etdikləri hallar həm sanitar-gigiyenik vəziyyət, həm də tibb personalının davranışı ilə bağlı ciddi suallar yaradır.
İddialara görə, doğum şöbəsinə qəbul zamanı pasiyentlərin mobil telefonları toplanılır. Şikayətçilərin sözlərinə əsasən, bunun məqsədi sonradan hər hansı problem yarandıqda foto və ya video çəkiliş aparılmasının, eləcə də yaxın qohumlara məlumat verilməsinin qarşısını almaqdır. Bu iddialar təsdiqini tapacağı təqdirdə, onların hüquqi qiymət alması vacibdir.
Uşaq bölməsi ilə bağlı da narazılıqlar səsləndirilir. Bildirilir ki, ilk günlər yeni doğulmuş körpələrə tibb personalı nəzarət etməli və qidalanma zamanı körpələr analarına gətirilməlidir. Lakin iddialara əsasən, körpələr gecə-gündüz anaların yanında saxlanılır və bütün məsuliyyət onların üzərinə qoyulur.
Valideynlər bildirirlər ki, şöbədə kondisioner və ya normal havalandırma sistemi yoxdur. Pəncərələrin setkasız açıq qalması səbəbindən otaqlara ağcaqanad və digər həşəratlar daxil olur, nəticədə yeni doğulmuş körpələrin bədənində dişləmə izləri əmələ gəldiyi iddia edilir.
Şikayətçilərin sözlərinə görə, bu vəziyyətlə bağlı irad bildirdikdə onlara "parça almalı idiniz" cavabı verilib. Halbuki, onların iddiasına əsasən, xəstəxanaya qəbul zamanı belə bir ehtiyac barədə heç bir məlumat verilməyib. Həmçinin tibb personalının "biz bütün uşaqlara çatdıra bilmirik" məzmununda ifadələr işlətdiyi də bildirilir.
Bundan başqa, şikayətçilər uşaq bölməsində qeyri-rəsmi ödəniş tələb olunduğunu da iddia edirlər. Onların sözlərinə görə, yaxınları ziyarət zamanı "şirinlik" vermədikdə, xəstəxanadan çıxış zamanı "Biz uşaqlarınıza baxmışıq, uşaq bölməsinin hörməti 50 manatdır" deyilərək 50 manat məbləğində pul tələb olunur.
Həmçinin xəstəxananın ikinci mərtəbəsinin dəhlizində pişiklərin sərbəst gəzdiyi müşahidə edildiyi bildirilir ki, bu da doğum şöbəsində sanitar-gigiyenik normaların vəziyyəti ilə bağlı narahatlıqları artırır.
Səsləndirilən bütün bu iddiaların – pasiyentlərin mobil telefonlarının toplanılması, yeni doğulmuş körpələrə lazımi tibbi nəzarətin göstərilməməsi, sanitar-gigiyenik problemlər, qeyri-rəsmi ödəniş tələbləri və digər halların TƏBİB, Səhiyyə Nazirliyi və digər aidiyyəti dövlət qurumları tərəfindən operativ, obyektiv və şəffaf şəkildə araşdırılması zəruridir. Əgər iddialar təsdiqini taparsa, məsul şəxslər barəsində qanunvericiliyə uyğun tədbirlər görülməlidir.
Yeni doğulmuş körpələrin və anaların sağlamlığı, təhlükəsizliyi və keyfiyyətli tibbi xidmət almaq hüququ hər zaman təmin edilməli və bu sahədə səsləndirilən hər bir ciddi iddia obyektiv araşdırılmalıdır.