Azərsun Holdinqdə bölmə rəisi vəzifəsində çalışmış Zahid Ələsgərov əmək hüquqlarının pozulduğunu iddia edərək aidiyyəti dövlət qurumlarına müraciət etməyə hazırlaşdığını bildirib.
Onun sözlərinə görə, əmək münasibətlərinə xitam verilərkən son əməkhaqqından heç bir yazılı xəbərdarlıq və hüquqi əsas göstərilmədən 420 manat məbləğində tutulma aparılıb. O iddia edir ki, tutulmanın səbəbi barədə ona hər hansı izahat və ya təsdiqedici sənəd təqdim edilməyib.
Zahid Ələsgərov bildirir ki, Azərbaycan Respublikasının Əmək Məcəlləsinə əsasən işçinin əməkhaqqından tutulmalar yalnız qanunla nəzərdə tutulmuş hallarda və müvafiq hüquqi əsas olduqda həyata keçirilə bilər. O hesab edir ki, tutulmanın səbəbi barədə məlumatın verilməməsi əmək qanunvericiliyinin tələblərinə ziddir.
Bundan başqa, Zahid Ələsgərov işdən ştat ixtisarı ilə azad edildiyini və bu halda Azərbaycan Respublikası Əmək Məcəlləsinin işçilərə təminat və kompensasiyalarla bağlı müddəalarına uyğun olaraq ona ödənilməli olan kompensasiyanın da tam həcmdə verilmədiyini iddia edir.
Keçmiş əməkdaş bildirib ki, işəgötürəndən son hesablaşmanın əsaslandırılması, əməkhaqqından tutulmuş 420 manatın hüquqi əsasının izah edilməsi və qanunvericiliklə nəzərdə tutulan ödənişlərin təmin olunması tələb ediləcək. Əks halda, o, Dövlət Əmək Müfəttişliyi Xidmətinə və məhkəməyə müraciət edəcəyini qeyd edib.
Qeyd edək ki, Azərbaycan Respublikası Əmək Məcəlləsinin əməkhaqqının ödənilməsi və əməkhaqqından tutulmalarla bağlı müddəalarına əsasən, işçinin əməkhaqqından tutulmalar yalnız qanunla müəyyən edilmiş əsaslar və qaydalar çərçivəsində həyata keçirilə bilər. Həmçinin, ştat ixtisarı ilə əmək müqaviləsinə xitam verildiyi hallarda qanunvericilik işçilər üçün müəyyən təminat və kompensasiyalar nəzərdə tutur.

Şikayətçinin məhkəmə iddiasını sizə təqdim edirik. 
İddiaçı: Zahid Ələsgərov
Cavabdeh: Azərsun Holdinq
Hüquqi ünvan: __________________
İDDİA ƏRİZƏSİ
Əmək hüquqlarının pozulması, əməkhaqqından qanunsuz tutulmuş məbləğin, ödənilməmiş kompensasiyaların, maddi və mənəvi zərərin ödənilməsi barədə
Mən, Zahid Ələsgərov, Azərsun Holdinqdə bölmə rəisi vəzifəsində çalışmışam. Əmək müqaviləmə işəgötürən tərəfindən xitam verilmişdir.
İşəgötürən tərəfindən əmək münasibətlərimə xitam verilərkən Azərbaycan Respublikası Əmək Məcəlləsinin tələblərinə tam əməl edilməmiş, mənim əmək hüquqlarım kobud şəkildə pozulmuşdur.
İşdən çıxarıldığım zaman son əməkhaqqım hesablanmış, lakin mənə heç bir yazılı və ya şifahi məlumat verilmədən əməkhaqqımdan 420 (dörd yüz iyirmi) manat məbləğində tutulma edilmişdir. Bu tutulmanın hüquqi əsası, hesablanma qaydası və bunu təsdiq edən hər hansı sənəd mənə təqdim edilməmişdir.
Bundan əlavə, daimi iş yerimdən heç bir əsaslandırılmış izahat verilmədən və qanunvericilikdə nəzərdə tutulmuş prosedurlara tam əməl edilmədən kənarlaşdırılmağım məndə ciddi psixoloji sarsıntı yaratmışdır. Baş vermiş hadisələr nəticəsində uzun müddət güclü stress və emosional gərginlik yaşamış, səhhətimdə ciddi problemlər yaranmış, tibbi yardım almağa məcbur olmuşam. Bu hadisələr ailə həyatım, sosial vəziyyətim və əmək qabiliyyətimə mənfi təsir göstərmişdir.
Azərbaycan Respublikası Əmək Məcəlləsinin 172-ci maddəsinə əsasən işəgötürən işçiyə əməkhaqqını tam və vaxtında ödəməyə borcludur. Həmin Məcəllənin 175-ci maddəsinə əsasən əməkhaqqından tutulmalar yalnız qanunla müəyyən edilmiş əsaslarla həyata keçirilə bilər.
Əgər əmək müqaviləmə ştat ixtisarı əsasında xitam verilmişdirsə, Azərbaycan Respublikası Əmək Məcəlləsinin 77-ci maddəsinə uyğun olaraq mənə qanunvericilikdə nəzərdə tutulmuş bütün kompensasiyalar və təminatlar tam həcmdə ödənilməli idi.
İşəgötürənin qanunsuz hərəkətləri nəticəsində mənə həm maddi, həm də mənəvi zərər dəymişdir. Bu səbəbdən hüquqlarımın məhkəmə qaydasında bərpasını zəruri hesab edirəm.
Yuxarıda göstərilənləri nəzərə alaraq, məhkəmədən xahiş edirəm:
Azərsun Holdinq tərəfindən son əməkhaqqımdan tutulmuş 420 (dörd yüz iyirmi) manatın qanunsuz hesab edilməsini və həmin məbləğin mənə ödənilməsini.
Əgər əmək müqaviləmə ştat ixtisarı əsasında xitam verildiyi müəyyən olunarsa, qanunvericilikdə nəzərdə tutulmuş bütün kompensasiyaların və digər ödənişlərin hesablanaraq mənə ödənilməsi barədə qərar qəbul edilməsini.
İşəgötürənin qanunsuz hərəkətləri nəticəsində mənə vurulmuş mənəvi zərərin əvəzi olaraq 20 000 (iyirmi min) manat məbləğində kompensasiyanın cavabdehdən tutularaq mənə ödənilməsini.
Zərurət olduqda cavabdehdən əmək müqaviləsinin, işdən çıxarılma əmrinin, əməkhaqqının hesablanması sənədlərinin, son hesablaşma sənədlərinin, tutulmanın hüquqi əsasını təsdiq edən sənədlərin və digər aidiyyəti sənədlərin məhkəməyə təqdim edilməsinin tələb olunmasını.
İş üzrə çəkilmiş dövlət rüsumunun, nümayəndə xərclərinin və digər məhkəmə xərclərinin cavabdehin üzərinə qoyulmasını.
Əlavə olunur:
Şəxsiyyət vəsiqəsinin surəti;
Əmək müqaviləsinin surəti;
İşdən çıxarılma əmri;
Son əməkhaqqının hesablanması sənədləri;
Bank çıxarışı;
Dövlət Əmək Müfəttişliyi Xidmətinə edilmiş müraciətin surəti (mövcud olduqda); var
Tibbi arayışlar, epikrizlər və digər sübutlar (mövcud olduqda); var. 
Digər sübutlar.
İddiaçı:
Zahid Ələsgərov

Qeyd: Bu yazıda yer alan məlumatlar Zahid Ələsgərovun iddialarını əks etdirir. Məsələ ilə bağlı Azərsun Holdinqin mövqeyi təqdim olunacağı təqdirdə, həmin mövqe də dərc ediləcək.