Nəzərov Elşən adlı oxucumuz redaksiyamıza müraciət edərək Paşayev Fərid Məmmədtağı oğlunun qanunsuz əməlləri barədə daxili işlər naziri Vilayət Eyvazova və Baş prokuror Kamran Əliyevə müraciət edib. O bildirib ki, Paşayev Fərid qanunsuz qumar oyunlarının təşkil ilə məşğul olur: "Onun qanunsuz əməlləri insanların külli miqdarda borclanmasını hədəfliyir. Belə ki, Paşayev Fərid əvvəlcə insanlara kazino kodları satır. Həmin kazino kodlarını alan insanlar əvvəl  oynayaraq kiçik məbləğlərdə pul qazanmağa başlayırlar. Amma sonradan uduzmağa başlayır və onların Fərid Paşayevdən aldıqları kazino kodları üçün külli miqdarda borcları yaranır. Bu zaman həmin borcları geri almaq və kassaya qoymaq üçün Paşayev Fərid guya hansısa tanışından borclu şəxs üçün sələmə pul alacağını və zamin duracağını bildirir. Onun əməllərinə qurban gedən insanlar da məcbur qalıb razılaşırlar və sonda külli miqdarda faizlərlə üzləşir, borclanırlar. Paşayev Fərid qurduğu bu mexanizm ilə insanlara öz pulunu sələm adı ilə yüksək faizə verir". Müraciətçi bildirib ki, Fərid Paşayev bu yollarla özünə saysız- hesabsız daşınmaz əmlak, avtomobillər alıb: "Həmçinin Bakıda məşhur “124” seriyalı maşın nömrələri Paşayev Fəridə məxsusdur".
Müraciətdən aydın olur ki,  Fərid Paşayevin qanunsuz əməllərinin qurbanlarından biri də Nəzərov Elşəndir. O bildirib ki, Fəridlə ilk dəfə qumar kodları alaraq tanış olub. Bununla da sonra Paşayev Fəridin tələsinə düşən şikayətçi ondan 80 min manat məbləğində faizə pul alır. Zərərçəkmiş deyir ki,  Fəridə 18 ay hər ay 8 min manat olmaqla borc ödəyib. Bundan  əlavə, yığılmış faizlərin əvəzinə Paşayev Fərid zərərçəkmişdən 100 min manat dəyərində mənzil alıb:"Ümumiyyətlə isə Paşayev Fərid məndən 200 min manatdan çox vəsaiti təkcə verdiyi pulun faizi olaraq alıb". Müflis olmuş zərərçəkən artıq ödəniş edə bilməyəcəyini bildirəndə Paşayev Fərid onu həbs etdirəcəyi ilə hədələyib, təhdid edib. O, bu qanunsuz əməlini Xəzər  rayon Prokurorluğu vasitəsilə həyata keçirib. Zərərçəkmiş deyir ki, onu Xəzər rayon Prokrorluğuna apararaq hədə- qorxu gəliblər və 10 gün ərzində pulu ödəməyəcəyi təqdirdə həbs edəcəklərini deyiblər:"Paşayev Fərid  güc strukturlarının yaxın olduğu əməkdaşları, polislər, prokurorluq işçiləri ilə əlbir olub sələmə verdiyi pulları yüksək faizlə geri alırdı". 
Zərərçəkmiş bildirib ki, Paşayev Fəridin qanunsuz əməllərindən xeyli sayda zərərçəkmiş var:"Onun barəsində çox sayda şikayətlər var. Ancaq heç biri ilə bağlı tədbir görülmür".
Çıxılmaz vəziyyətdə qalan şikayətçi daxili işlər naziri Vilayət Eyvazov və Baş prokuror Kamran Əliyevdən kömək istəyib:"Paşayev Fəridin qanunamüvafiq şəkildə cəzalandırılmasına və mənə dəymiş zərərin geri ödənilməsinə yardımçı olmağınızı  xahiş edirəm".