Yasamal rayonunda ötən ilin noyabrında baş vermiş və 3 şəxsin həyatına son qoyan, onlarla sakinin xəsarət almasına səbəb olan yanğınla bağlı cinayət işi üzrə istintaq yekunlaşıb.

Bakufakt.az  xəbər verir ki, Prokurorluğun açıqladığı nəticələrə görə, faciənin mərkəzində çoxmərtəbəli yaşayış binasının aşağı mərtəbələrində fəaliyyət göstərən stomatoloji klinikanın rəhbəri dayanır. Baş Prokurorluqdan bildirilib ki, 2025-ci il noyabrın 21-də Yasamal rayonu, Mirəli Seyidov küçəsində yerləşən yaşayış binasında baş verən yanğın faktı üzrə aparılan geniş istintaq başa çatdırılıb və materiallar baxılması üçün Bakı Ağır Cinayətlər Məhkəməsinə göndərilib. Hadisə paytaxt sakinlərinin yaddaşında ən ağır yanğınlardan biri kimi qalıb. Fövqəladə hallar xidmətlərinin saatlarla davam edən müdaxiləsinə baxmayaraq, yanğın nəticəsində 3 nəfər həyatını itirib, 25 nəfər müxtəlif dərəcəli xəsarətlər alıb. Binanın çoxsaylı mənzillərinə və ümumi əmlakına ciddi maddi ziyan dəyib.

Baş Prokurorluğun Kriminalistika və informasiya texnologiyaları idarəsində aparılan istintaq zamanı müəyyən edilib ki, binanın birinci və zirzəmi mərtəbələrində yerləşən “Loft Dent” stomatoloji klinikasında yanğın təhlükəsizliyi qaydalarına əməl olunmaması ağır nəticələrə səbəb olub. İstintaqın qənaətinə görə, klinikanın direktoru, 1986-cı il təvəllüdlü Bəhruz Paşayev üzərinə düşən yanğın təhlükəsizliyi öhdəliklərini lazımi qaydada yerinə yetirməyib. Nəticədə baş verən yanğın nəzarətdən çıxaraq yaşayış binasının digər hissələrinə yayılıb və insan tələfatı ilə nəticələnib. Müstəntiqlər hesab edirlər ki, məhz bu pozuntular faciə ilə səbəb-nəticə əlaqəsində olub. Toplanmış sübutlar əsasında Bəhruz Paşayevə Azərbaycan Respublikası Cinayət Məcəlləsinin 225.3-cü maddəsi ilə yekun ittiham elan edilib. Həmin maddə yanğın təhlükəsizliyi qaydalarına riayət etmək vəzifəsi daşıyan şəxsin bu qaydaları pozması nəticəsində ehtiyatsızlıqdan iki və ya daha çox şəxsin ölümünə səbəb olması hallarını nəzərdə tutur. İstintaq dövründə prokurorun təqdimatı və müstəntiqin vəsatəti əsasında məhkəmə tərəfindən onun barəsində həbs qətimkan tədbiri seçilib.

İşin Bakı Ağır Cinayətlər Məhkəməsinə göndərilməsi ilə artıq hadisənin hüquqi qiymətləndirilməsi mərhələsi başlayır. Qarşıdakı prosesdə yanğının başvermə mexanizmi, təhlükəsizlik tələblərinin hansı formada pozulduğu, faciənin qarşısının alınıb-alına bilməsi və vurulan ziyanın miqyası məhkəmə araşdırmasının əsas mövzularından olacaq. Bu iş eyni zamanda yaşayış binalarında fəaliyyət göstərən kommersiya obyektlərinin təhlükəsizlik standartlarına nə dərəcədə əməl etməsi məsələsini yenidən gündəmə gətirir.

Son illərdə müxtəlif təyinatlı obyektlərin yaşayış binalarında yerləşdirilməsi ilə bağlı aparılan müzakirələr fonunda Yasamaldakı faciə təhlükəsizlik qaydalarının formal prosedur deyil, insan həyatı ilə birbaşa bağlı məsələ olduğunu bir daha xatırladır.