Son günlər estetik və plastik cərrahiyyə fəaliyyəti ilə bağlı sosial şəbəkələrdə yayılan müxtəlif iddialar həkim Natavan Əmirovanın cavab verməsinə səbəb olub. Əmirova “Instagram” hesabında yayımladığı paylaşımlarda onun təhsili və peşə fəaliyyəti ilə bağlı səsləndirilən fikirlərə münasibət bildirib və bir sıra sənədləri ictimaiyyətə təqdim edib. Həkim əvvəlcə Azərbaycan Tibb Universitetini yüksək balla bitirdiyini və universiteti qırmızı diplomla başa vurduğunu bildirib. Bu fikirlərini təsdiqləmək məqsədilə ali təhsil haqqında diplomunun görüntülərini də paylaşıb. Əmirovanın təqdim etdiyi digər sənədlər arasında Azərbaycan Tibb Universitetində təhsil alması, internatura keçməsi və həkim-cərrah ixtisası üzrə kvalifikasiya almasını göstərən sənədlər də yer alıb. O, həmçinin praktik tibbi fəaliyyətlə bağlı sertifikasiya şəhadətnaməsini paylaşaraq ümumi cərrahiyyə ixtisası üzrə sertifikasiyadan keçdiyini və bu sahədə fəaliyyət göstərmək hüququnun olduğunu bildirib. Əmirova paylaşımında hazırda böyük bir xəstəxananın cərrahiyyə şöbəsində rəhbər vəzifəsində çalışdığını da qeyd edib. “Həqiqətə uyğun olmayan məlumatlar məsuliyyət yarada bilər” Həkim sosial şəbəkələrdə onun haqqında yayılan məlumatlara da münasibət bildirib. O, bəzi şəxslərin təhsili və peşə fəaliyyəti ilə bağlı həqiqətə uyğun olmayan məlumatlar yaydığını və bunun qanunvericiliklə müəyyən edilmiş məsuliyyət yarada biləcəyini vurğulayıb. Əmirova bildirib ki, məktəbi eksternat yolu ilə bitirib, yüksək nəticə göstərərək Tibb Universitetinə qəbul olunub və universiteti qırmızı diplomla başa vurub. O, həmçinin onun təhsili ilə bağlı sənədlərin ictimailəşdirilməsini tələb edən şəxslərə müraciət edərək, həmin şəxslərin də öz təhsil və peşə fəaliyyəti ilə bağlı sənədlərinin araşdırılmasını təklif edib. “Əgər keçən dəfə düzgün başa düşdümsə, dırnaqarası bəzi şəxslər anlamayıblar ki, mən məktəbi eksternat yolu ilə bitirib, yüksək bal toplayaraq Tibb Universitetinə daxil olmuşam və universiteti qırmızı diplomla bitirmişəm”, – deyə həkim paylaşımında bildirib. Sənədlər nəyi göstərir? Əmirovanın paylaşdığı sənədlərdə onun Azərbaycan Tibb Universitetində tibb təhsili alması, internatura keçməsi və cərrah ixtisası üzrə kvalifikasiya əldə etməsi ilə bağlı məlumatlar yer alır. Paylaşılan sertifikasiya şəhadətnaməsində isə onun “Ümumi cərrahiyyə” ixtisası üzrə praktik fəaliyyətlə məşğul olmaq üçün sertifikasiyadan keçdiyi qeyd olunur. Bununla yanaşı, təqdim olunan sənədlərin məhz plastik cərrahiyyə ixtisası üzrə ayrıca praktik fəaliyyət icazəsini təsdiqləyib-təsdiqləmədiyi məsələsi müvafiq rəsmi reyestrlər və səlahiyyətli dövlət qurumlarının məlumatları əsasında ayrıca dəqiqləşdirilməlidir. Qeyd edək ki, bu xəbər yalnız Natavan Əmirovanın sosial şəbəkədə paylaşdığı açıqlamalar və sənədlər əsasında hazırlanıb. Təqdim olunan sənədlərin hüquqi qüvvəsi, həqiqiliyi və onların plastik cərrahiyyə fəaliyyəti üçün hüquqi əsas olub-olmaması ayrıca rəsmi qaydada təsdiqlənməyib. Qarşı tərəfin iddiaları ilə bağlı yekun hüquqi qiymət isə yalnız səlahiyyətli qurumların araşdırmasından sonra verilə bilər. BakuFakt.az