2023-cü ildə İsmayıllıda 40 yaşlı Gülsüm Osmanovanın (ad-soyad şərtidir-red.) intiharına görə açılmış cinayət işi üzrə barəsində 6,6 ay azadlıqdan məhrumetmə cəzası təyin edilmiş Şıxıyev Elxan Ədalət oğlunun ailəsi qərardan və ümumilikdə məhkəmə araşdırmasının gedişindən narazıdır. Bu məqsədlə onlar  Ədliyyə naziri Fərid Əhmədova, Ali Məhkəmənin sədri İnam Kərimova, Məhkəmə-Hüquq Şurasına müraciət ünvanlayıblar. Şixiyeva Familə Ağasəf qızı tərəfindən ünvanlanan müraciətdə bildirilir ki, İsmayıllı rayon Məhkəməsinin 4 mart 2025-ci il tarixli hökmü ilə Elxan Şıxıyevə 6 il 6 ay həbs cəzası verilib və məhkəmə zalındaca həbs olunub. Lakin ailə bildirir ki, iş düzgün araşdırılmayıb və əslində Elxan Şıxıyev özü zərərçəkən olduğu halda ona ittiham elan edilib. Bundan başqa, cavabdeh tərəf məhkəmənin açıq keçirilməməsindən şikayətçidir.  Müraciətdə bildirilir ki, 12 məhkəmə iclasına əsas şahidin gətirilməsi mümkün olmayıb:  
“İlqar Hüseynovun sədrliyi ilə keçrilən məhkəmə iclasında çıxarılan hökmdə bildirilir ki, Azərbaycan Respublikası Cinayət Məcəlləsinin 125, 157.2 və 221.2.2-ci maddələri ilə təqsirləndirilməsinə dair cinayət işinə açıq məhkəmə iclasında baxılıb. Əslində isə heç kimi məhkəmə iclaslarına buraxmadılar, faktiki olaraq iclaslar qapalı keçirildi. Həmin hadisə zamanı döyülən, zədə alan, ruhi əsəb dispanserində müalicə olunan Elxan olduğu halda, ittiham da ona elan edilib.  Məhkəmənin gedişində ifadələr həqiqətə uyğun olmayıb, şahidlərin ifadələri proses boyunca dəyişdirilib. Hətta aydın olub ki, Elxanın ibtidai istintaqa verdiyi ifadələr də zərərçəkmiş tərəfin xeyrinə dəyişdirilib. Elxan bu barədə müstəntiqə deyəndə, o, həmin ifadələrin sonradan mətndən çıxarılacağını desə də,  məhkəmədə aydın olub ki, çıxarılmayıb və Elxanın istintaqda demədiyi sözlər ifadəyə daxil edilib. Nəticədə Elxana 6 il 6 ay həbs cəzası verilib, halbuki bütün rayon onun bu məsələdə cavabdeh yox, zərəçəkən tərəf olduğunu bilir. Çünki mərhumun istəyi ilə hadisə yerinə çağırılan şəxslər Elxana ciddi xəsarət yetirib və bu şahidlərin gözü qarşısında baş verib. İş düzgün və hərtərəfli araşdırılsaydı, həqiqət ortaya çıxacaqdı. Ancaq hansısa maraqlı tərəflər işin düzgün araşdırılmasının qarşısını alıb”. 

Müraciətdə bildirilir ki, hökm elan olunarkən Elxanın xəstəliyi, ilk məhkumluğu, azyaşlı övladlarının olması, valideynlərinin səhhəti kimi məsələlər nəzərə  alınmayıb: “Bu da işin məhkəmə araşdırmasının düzgün aparılmamamasını sübut edir”.  
Çıxarılan hökmdən narazı qalan ailə müraciət etdiyi dövlət qurumlarından işin düzgün araşdırılması üçün müvafiq göstəriş verilməsini xahiş edib. 
“Bakufakt.az”