Xaricdə təhsil arzusu dələduzların qazanc mənbəyinə çevrilməməlidir

Son illər Azərbaycanda xaricdə təhsil almaq istəyən gənclərin sayı artdıqca, bu sahədə fəaliyyət göstərən vasitəçi şirkətlərin də sayı sürətlə çoxalır. Xüsusilə qəbul mövsümündə sosial şəbəkələrdə "100 faiz qəbul", "vizaya zəmanət", "qısa müddətdə universitet yerləşdirilməsi" kimi vədlərlə reklam aparan şirkətlər meydana çıxır. Mövsüm başa çatdıqdan sonra isə onların bir hissəsi ya fəaliyyətini dayandırır, ya da vətəndaşların zəng və müraciətlərinə cavab vermir.

Son günlər "Aid-Group" xaricdə təhsil şirkəti və onun rəhbəri Nigar Fərhad barədə yayılan şikayətlər də bu sahədə mövcud riskləri yenidən gündəmə gətirib. Şikayətçilər iddia edirlər ki, yüksək məbləğdə ödəniş etmələrinə baxmayaraq, nə təhsil prosesi başlayıb, nə də ödənilən vəsait geri qaytarılıb. Məsələ ilə bağlı hüquq-mühafizə orqanlarına müraciət edildiyi bildirilir. Bu iddiaların hüquqi qiyməti isə yalnız istintaq və məhkəmə araşdırmalarından sonra məlum olacaq.

Bu cür halların əsas səbəblərindən biri vətəndaşların qərarlarını reklam əsasında verməsidir. Təəssüf ki, bəzi şirkətlər müğənnilərin, sosial media fenomenlərinin və ya tanınmış şəxslərin reklamından istifadə etməklə etibarlılıq görüntüsü yaradırlar. Halbuki məşhur simanın reklamda görünməsi həmin şirkətin etibarlı olması demək deyil.

Xaricdə təhsil şirkəti seçərkən nələrə diqqət edilməlidir?

- Universitetin rəsmi internet səhifəsində həmin şirkətin rəsmi tərəfdaş olub-olmadığını yoxlayın.
- Universitetdən qəbul məktubunun birbaşa sizə göndərilməsini tələb edin.
- Müqaviləni hüquqşünasa göstərmədən imzalamayın.
- Bütün ödənişləri bank vasitəsilə edin və qəbzləri saxlayın.
- "100 faiz qəbul", "100 faiz viza", "zəmanət" kimi vədlərə inanmayın.
- Şirkətin əvvəlki müştərilərinin real təcrübələrini araşdırın.
- Şirkətin hüquqi qeydiyyatı, vergi məlumatları və faktiki ofisinin mövcudluğunu yoxlayın.
- Böyük məbləği əvvəlcədən tam şəkildə ödəməyin. Xidmət mərhələlərlə göstərildikcə ödəniş etmək daha təhlükəsizdir.

Xaricdə təhsilə üstünlük verilərkən əsas meyar nə olmalıdır?

Xaricdə təhsil seçimi reklamla deyil, universitetin akademik nüfuzu, beynəlxalq reytinqi, tədris proqramının keyfiyyəti, diplomun tanınması, məzunların məşğulluq göstəriciləri və təhsil xərclərinin şəffaflığı əsasında edilməlidir. Ən etibarlı məlumat mənbəyi universitetlərin rəsmi internet səhifələri və rəsmi qəbul şöbələridir.

Vətəndaşlar unutmamalıdırlar ki, xaricdə təhsil arzusu böyük maliyyə vəsaiti tələb edir. Buna görə də qərarlar emosiyalar və reklamlara deyil, sənədlərə, hüquqi təminatlara və rəsmi məlumatlara əsaslanmalıdır.

Əks halda, parlaq reklamlar və məşhur simaların iştirakı ilə qurulan görüntü bir çox ailənin illərlə topladığı vəsaitin itirilməsi ilə nəticələnə bilər.